أبيض * أسود

Table of content

عارفين الكوره
أيوه أيوه اللي مجننه الناس دي

هسألكم سؤال ف الكوره اهو ركزوا بقى ؟؟؟

الكوره دي ليها كام وجه او كام جانب ؟؟

طيب لو الكوره دي نصها لونه أبيض والنص التاني لونه أسود

وحطيت الكوره دي بين فردين
وسألت كل واحد الكوره دي لونها ايه هيجاوبوا هيقولوا ايه؟؟

اللي قدامه النص الأبيض هيقولك وهو متأكد 100% انها بيضاء

والتاني هيقولك والله العظيم دي سوده وبرضه متاكد 100%

وهيقعدوا يتخانقوا طبعا
ولو من النوع الرخم مش حيسمعوا بعض
وكل واحد يفضل يتكلم ويقولك والله بيضا
والتاني مُصر اصرارا انها سوده

طيب دلوقتي هم صوتهم بقى عالي قوي
والجيران سمعوا دا بيقول والله بيضا والتاني بيقولك لا دا مبيشوفش دي سودا

انت بقى حط نفسك مكان الجار اللي سمعهم بس

ها هتصدق مين ؟؟؟

انها بيضا ولا سودا

طيب انا كراجل طيب
و عمال اتحايل عليهم للي شايفها بيضا طيب تعالى بس شوفها من الناحيه دي
يقولك ما انا شايفها بيضا اهو انت هتجنني بيضا يعني بيضا معنديش غير كدا
والتاني نفس الحكايه

المهم يعني كل حاجه عندي شبه الكوره
نصها قدامي ونصها التاني مش شايفاه

يعني لما اقول رأي محدش يقولي لأ انتي غلط
ولا ومينفعش وازاي

ييجي بس يقولي رأيه
وانه من وجهه نظره شايف كذا وكذا
ومش لازم يعني لما تكلم حد مختلف معاك يا إما تقنعه يا إما يقنعك
المفروض يبقى فيه حوار
مقتنعتش خلاص براحتي كل واحد عاجبه دماغه ومش عايز يغيرها

(مش قصدي انا انا اقصد كل أي حد وهو بيتكلم مع أي حد)

نصيحه بس أول ما تشوف كوره حاول تشوفها من جميع الاتجاهات والجوانب
قبل ما تجادل ف لونها ابيض ولا اسود

الكوره دي ترمز لأي حاجه بقى وجهه نظر أو شخص معين أو حكومه او حاله او ثوره او مظاهره أو الشرطه او الجيش او حكايه

أو حتى أنا