نابليون العصر القديم تحتمس الثالث

نابليون العصر القديم
==============

كان الملك تحتمس الثانى متزوج من زوجة ملكة اسمها حتشبسوت خلفت ليه بنتين الاولى اسمها "مريت رع" والثانية اسمها "نفرو رع" وكان له زوجة ثانوية اسمها ايزيس خلفت له ابن سماه تحتمس اللى هيبقى بعدين تحتمس الثالث او زى ما بنسميه حديثا "نابليون العصر القديم" 
وبعد وفاة تحتمس الثانى المفروض ان ابنه اللى من زوجة غير ملكية يتزوج من اخته الاميرة عشان يكتسب الشرعية للحكم 
مانا نسيت اقولكم ان الحكام فى مصر القديمة كان لازم يكونوا من امهات ملكية او يتجوزا من اميرات القصر عشان ياخدوا شرعية حكم مصر ودا مش شئ وحش لانه بيوضحلنا المكانة اللى كانت فيها المرأة المصرية .. المهم خلينا نكمل موضوعنا:

فى الوقت اللى مات فيه تحتمس الثانى كان ابنه تحتمس الثالث حديث سن وبالتالى هيكون تحت الوصاية لحد ما يكون قادر على حكم البلاد طبعا دا كان محبب لحتشبسوت اللى لاقت فى الموضوع ما يمكنها من حكم مصر ولكن اذاى وحدة ست هتحكم مصر فهل نفذت الرجال!! الحقيقة ان اللى كان بيساعد الملك فى حكمه ورضا الشعب عنه كان عامل دينى بيتمثل فى الكهنة فحتشبسوت رأت انها تراضيهم وتكسبهم فى صفها والحقيقة هما وقفوا معاها وقفة رجالة وبالفعل تمكنت من حكم مصر حوالى 20 ولكن عشان ترضى الشعب عنها تمثلت فى زى الرجال طيب تحتمس الثالث فين من الاحداث دى؟ ببساطة حتشبسوت كانت زكية فشافت ان افضل شئ يبعد زوج بنتها عن الحكم انها تبعته للمعبد عشان يتعلم ماهو المعبد فى الوقت دا كان زى الجامعة النهاردة
ويمر بينا الزمن وتموت الملكة حتشبسوت ويرجع البطل يستلم عرش مملكته فى الوقت اللى خلى الاعداء تطمع فى ارضه ولكنه واقف لهم بالمرصاد .. وبسبب سياسة السلم والهدنة اللى كانت سائدة فى ايام حتشبسوت تحالف امراء غرب اسيا بقيادة امير قادش على مصر ولكن الملك الجديد كان قوى وقاد ضدهم حملته الاولى الى مجدو وانتصر فيها والمصادر اللى بتحكلنا عن حملات تحتمس الثالث على المتمردين بتذكر انه قاد حوالى 16 حملة انتصر فى جميعها وكان دائما ما يصاحبه فى حملاته العسكرية مجموعة من الكتبة والكهنة والعلماء لتسجيل كل ما يرونه فى هذه العملات فكانت اشبه بالبعثات العلمية وعادة ما يؤرخ بداية حكمه من بعد وفاة والده مباشرة دون النظر لفترة حكم حتشبسوت ولانه كان مهتم بالشئون الخارجية للبلاد فكان اقصى اتساع لحدود مصر فى عهده وترك لنا العديد من الاثار اللى بتخلد اسمه الى الان اهمها صالات معبد الكرنك والمسلات اللى اتنقلت الى نيويورك ولندن واسطنبول وروما واصبحت سفراء لمصر فى هذه البلاد كما اقام بعض المعابد فى جنوب مصر.. وعن مقبرته بوادى الملوك نجد بها شئ فريد من نوعه وهو تابوت الملك المصنوع على شكل خرطوش حتى حجرة الدفن ذاتها منحوته على نفس الشكل ولانه اتهم افتراضا بانه فرعون الخروج فلا توجد ادلة على هذه الافتراضات واشكركم للمتابعة

#تحتمس_الثالث
#نابليون_العصر_القديم

#اعرف_تاريخ_بلدك