ومن مميزات هذه الاكلات انها لذيذه جداً وغير مكلفه وتحتوى علي سعرات
حراريه قليله جدا وبالتالي لادعي للحرمان بعد اليوم وتتميز اكلات الدايت
انها غير مكلفه وطرقه تحضيرها غايه في السهوله ...-1- البيض بالفلفل:
في طاسة تيفال وتقطعي الفلفل قطع صغيره او لو طاسة عادية حطي ملعقة صغيره جدا زيت زيتون وقلبي الفلفل لحد ما يدبل خالص وحطي معاه ملح وفلفل وخضرة متقطعه وعليها البيض هتطلع قرص جميل جدا وممكن تحطي على الوش زيتون حلقات او طماطم حلقات وبالهنا والشفا
2- سلطة الجبنة المتبله
بتجيبي بصلة وتبشريها او تفرميها وعليه فص ثوم وملح وفلفل وكمون حسب الرغبة وتعصري عليها ليمون ونقطتين خل وقلبي التتبيله كويس واهرسي الجبنه فيها او قطعيها مكعبات وتجيبي اوراق جرجير تغمسيها في التتبيله وتزيني بيها الوش ولو عندك بقدونش ورشة نعناع مطحون بيدي طعم تحفه جدا السلطه دي مع كوبايه شاي مش هتحتاجي تاكلي حاجه لاخر اليوم
3- سلطة البيض المسلوق
تسلقي البيض وتقطعيها مكعبات البياض لوحده والصفار لوحده وتجيبي علبة زبادي وتضربيها بالمعلقه وتحطي عليها ملح وفلفل وثوم مطحون او مفروم وملعقة صغيره اوي طحينه او بدون وترشي الصلصه دي على وش البيض وتزيني باوراق البقدونش والنعناع وقطع الطماطم
الاكلات دى تنفع للغداء
1- البطاطس المتبله
بقطع البطاطس شرائح سميكه واحطها في ميه وملح عشان تتطرى شويه واجيب بصلة وكام فص ثوم واهرسهم وعليهم فص ليمونه وملح وفلفل وخل وبقدونس وشبت مفروم واغمس شرائح البطاطس فيهم نص ساعه وبعدين اشيلهم وهم فيهم التتبيله وارصهم في صينية وارش عليهم شوية ميه وادخلهم الفرن نص ساعه بتطلع روعه بجد
2- صينية الخضار في الفرن
بجيب حله واحط فيها بصل مفروم وثوم وملح وفلفل وبهارات وخضره مفرومه وشوية ميه صغيرين واسيبهم يتبلوا بعض والبصل يدبل وبعدين احط معلقتين صلصه واسيبهم يغلوا شويه وبعدين اجيب صينية وارص فيها الخضار جزر وبسله وفاصوليا وبطاطس وكوسه وباذنجان وبصل وطماطم وارش عليهم الصلصه اللي عملتها دي واغطيها بورق فويل وادخلها الفرن نص ساعه او ثلث ساعه حسب حرارة الفرن
Post a Comment