1- ستايل(البدلة) هذا الستايل ايكون البنطرون والستره بنفس درجه اللون بالضبظ , هذا موديل صارله اكثر من سنه واعتقد راح يستمر لفتره طويله , طبعا اللون يعتمد على حسب ذوقج ممكن ايكون باللوان اساسيه مثل الاسود , النيلي , البيجي او اذا انتي جريئه اكثر جربي اللوان مثل الوردي او السماوي او الاحمر ,وبنات هذا الستايل راح ايبينج اضعف حتى لو جان لون الستره والبنطرون فاتح , وملاحظه مهمه لازم القميص الي جوه الستره ايكون فاتح وساده مثل الابيض او البيجي حتى لون الستره والبنطرون هو الي يكون بارز .

2- ممكن تنسقين الستره ويه الفساتين الطويله او القصيره وممكن الفستان ايكون مشجر او ساده بس اكو كم ملاحظه مهمه اول شي لازم الستره متكون كولش طويله ووكولش عريضه لان الفستان بهيج حاله راح ايضيع ومراح ايبين ,ثاني شي الفستان ميكون كولش عريض لان راح ايبين مثل طبقات قماش جوه الستره , وشي ثالث اذا الفستان مشجر لازم الستره اتكون ساده والعكس صحيح وانتبهي على الشال الي تختاري والافضل ايكون ساده حتى نقشه الفستان او الستره هي الي تبرز .

3- ممكن تنسقين الستره ويه التنورات الي خصرها عالي او ويه الكيلوتات العريضه بس بهيج حاله الافضل ادخلين القميص جوه التنوره اوالكيلوت لان اذا بقيتي طالع راح ينطيج منظر ممرتب وهوسه .

4- ممكن تنسقين الستره بستايل شبابي اكثر بعده طرق مثلا تلبسين جواها تيشرت بي طبعات او كتابات , ممكن تلبسيها ويه جينز مشكك , ممكن تلبسيها ويه حذاء رياضي , ممكن تلبسين جواها قميص مقلم او منقط .

5- نصيحه اخيره حاولي دائما تشترين الستره الي اتكون ساده وابتعدي عن الستره الي بيها لمع وهوسه حتى انتي تكدرين تلعبين بالالوان والاكسسوارات على راحتج وتكدرين تلبسيها بكل وقت بدون متتقيدين , وهيج ستر كولش عمليه يعني مجرد تلبسين وياها بنطرون او تنوره بلون حلو راح تتغير 180 درجه .