1- اول واهم نصيحة دائما اختاري البنطرون او التنورة بلون غامق والقماش ايكون سادة ما بي اي نقشة
واختاري بقصة عدلة يعني متكون ضيقه وتبرز الارداف اكثر ولا اتكون كولش عريضه او منفوشة لان راح تضيف حجم اكبر للجزء السفلي وطبعا هذا شي مو من صالحج وختاري البنطرون والتنورة بخصر عالي لان راح تنطي شكل احلى الجسمج وتبينج اضعف وابتعدي عن التنورات القصيرة الي تجي فوك الركبة لان نهائيا متناسبج  وبالعكس راح تبرز عيوب جسمج اكثر  .

2-  الجزء العلوي من الجسم حاولي تبدعين بي يعني اختاري القمصان باللوان فاتحه او مشجرة او بيها باف او الي بيها جيوب كبار او لؤلؤ وبكل الكصات والاشكال  والالوان الي تعجبج حتى ننطي حجم اكبر للجزء العلوي ونخلق توازن مع الجزي السفلي .

3- الاكسسوارات مثل القلادة حاولي تختاريها بحجم جبير وبارز حتى تلفت الانتباة وتشد النظر بعيد عن المنطقة السفلية من جسمج , وحلو تلبسين حزام وتحطي على منطقة الخصر حتى تيرزين خصرج وتحددي اكثر وابتعدي عن الاحزمة الي تجي على البطن لان نهائيا متناسبج .

4- الحذاء سواء كعب او فلات لازم ايكون مدبب من كدام وبلون قريب على لون البنطرون او بلون نيود قريب على لون بشرتج  حتى اتبين رجليج اطول واضعف و ابتعدي عن الجنط الي سيرها طويل وتوصل للارداف لان راح تكبر منطقة الارداف اكثر والافضل تختارين  الموديلات الي تنلبس على الكتف او تنشال بالايد احسن .

5- الفستان اختاري مفتوح من فوك حتى يبرز الاكتاف  ويكون محدد عند الخصر وينزل عريض على الارداف هذا يعتبر خيار امن ومناسب جدا لشكل جسمج .

6- السترة واليلك هم افضل حل للجسم الكمثري بس بشرط اتكون بطول مناسب ايغطي منطقة الارداف وابتعدي تماما عن الستر القصيرة لان راح تبرز عيوب جسمج اكثر والافضل اتكون بلون غامق او بلون قريب على لون البنطرون حتى تنطيج شكل اضعف.