عمرك سألت نفسك في ظل ما كل الناس بيشتكوا من الهم والقرف إذا كان في ناس مبسوطين بجد ولا لأ ؟!

عمرك سألت نفسك في ظل ما كل الناس بيشتكوا من الهم والقرف إذا كان في ناس مبسوطين بجد ولا لأ ؟!
خليني اقولك ان انور وجدي لما المذيعة سألتة ف نهايات حياته : ايه اسوء حاجة حصلتلك ؟! رد قال : اني طلقت ليلى مراد. فسألته ليه. وإزاي ؟!
رد قال : معرفش. كنت بحبها جدا. عايشين سعداء لاقصى حد. مكنتش بحكي عن حياتنا ولا بنسمح لحد يحكي. فجأة حكيت عن قصة حبنا، كفاحنا، نجاحنا، ازاي احنا عايشين في تفاهم ونعيم ف البيت.
...

بعدها كل حاجة بينا بقت وحشة بدون اسباب. ولقيت نفسي بخونها .. بعدين انفصلنا. بعدين فوقت لقيت نفسي شخص تاني ف عالم تاتي محبيتوش ولا كنت عاوزه.
_________
الممثلة ياسمين صبري اخدت شهرة كبيرة الفترة الاخيرة. لحد ما ظهرت في برنامج صاحبة السعادة وسألتها اسعاد يونس : مش ناوية تتجوزي ؟! وكانت المفاجأة لما قالتلها انا متجوزة من ٥ سنين وبحب جوزي جدا. اسمه محمد وبدلعه مودي. وبطبخ واغسل وست بيت شاطرة وجوزي بيحب اكلي.
لحد كده زي الفل..
اللي مش زي الفل ان ياسمين صبري اطلقت بعد ٢٠ يوم بس من الحلقة دي، وطلاق رسمي بالأوراق. اطلقت بعد ما حكت عن اجمل حاجة ف حياتها. واستقرارها. وراحة بالها.
________
من ٥ شهور كتبت كَ Jibril بوست قلت فيه : "حرفيا انا فالجنة، صحة، زوجة حلوة، اطفال صبيان وبنات، شغل بحبه، اخوات حلوين، عيله وظهر وسند".
وبعدها !!
دخلت المستشفى مرتين، اخدت علاج غلط بهدلني، انا وزوجتي حياتنا ولعت ولسه بين ايدين ربنا، اخواتي علاقتنا بقت زفت، فالشغل مشاكل ملهاش اخر. فالبيت علاقتنا زفت .. وتستمر المهزلة.
- الخلاصة : الحجات الحلوة بتستمر لما نخبيها، ونداري عليها ع قد ما نقدر، وبتروح اول ما نتكلم عنها.
متحكوش لحد ولا حتى اصحابكم، مش عشان هما وحشين انما عشان الحسد ممكن ميكونش بقصد. ولو انت حاكي لحد عن حاجة وملاحظ انها دلوقت بتروح منك. الحق طلع حاجة لله بنيه يصلحهالك. وتعالى ع نفسك شوية واتحمل عشانها.