واقف عند ال ATM عشان اسحب فلوس من المكنه ,قام جه راجل كبير كده ولقيته طلع كيس من جيبه , انا قولت هيطلع مطوه ويغزني وياخد الفلوس مني ,بس للأسف معملش كده
قام مطلع من الكيس كارت البنك الاهلي , وقالي ممكن بعد اذنك تسحبلي الفلوس اللي هنا ؟!
قولتله عيني يا حاج , مش اول مره يحصل معايا الموضوع ده عاده بيتكرر كتير لما بيبقي حد كبير ومش عارف يستخدم المكنه فبيخليني اسحبله الفلوس او استعلم له عن الرصيد
المهم دخلت الكارت بتاعه وفضلنا ساكتين دقيقه , فبقوله ها يا حاج ؟! بيقولي ها سحبت ؟! فبقوله سحبت ايه يا حاجه , الرقم السري ايه ؟!
فقالي هو لازم الرقم ؟! قولت في سري هو يوم باين من اوله , فقولتله اه يا حاج للأسف لازم الرقم عشان احنا في زمن الاخ بياكل اخوه فمعلش اعذر المكنه اللي مايعرفك يجهلك
فلقيته بيقولي طب هما عاوزين اني رقم سري ؟! فقولتله يا حاج الاربع ارقام بتوع الكارت , قالي اه , طب اكتب عندك 1234
طبعا اضايقت اوي من نفسي لأن في الغالب كل الناس اللي سحبتلهم فلوس قبل كده كانوا نفس الاربع ارقام فالمفروض بديهيا كنت اكتب الرقم لوحدي يعني وكأن المصريين كلهم عاملين نفس الرقم
المهم للأسف طلع الرقم غلط , فقولته يا حاج الرقم مش مظبوط , قالي خلاص يبقي جرب كده 1111
زعلت من نفسي اكتر لأن ازاي مجاش في بالي اني اجرب كده عشان برده معظم اللي مكانوش عاملينه 1234 , كانوا عاملينه 1111
برده الرقم طلع غلط , فقولتله يا حاج برده مش مظبوط , واديته البطاقه , فأخدها مني ومشي وبعد كده قام راجع تاني
بيقولي طب ماتحطها كده وتكتب الرقم السري بتاعك يمكن تفتح ؟! , قولتله يا حاج هو احنا بنفتح قفل عجله , هجرب المفتاح بتاعي يمكن يكون بيفتح ؟! انت روح البنك وغير الرقم السري عشان تعرف تسحب الفلوس
قالي حاجه غريبه اوي , قالي اصل البطاقه دي انا لقيتها في الشارع , وكل يوم بحاول اسحب يمكن تسحب معايا مفيش فايده , شكل ربنا مش رايد بقى , وقام سايبني وماشي
ساعتها صعبت عليا نفسي وقولت لنفسي اني لو عندي نص اصرار الحاج في ان الكارت يفتح ويسحب الفوس منه كان زماني دلوقتي ستيف جوبز او عبد الغفور البرعي حتى