نظرات استغراب وصمت اصابت كل اللي موجودين ، المخرج سأل المذيعه اذاكانت سألته سؤال سخيف او محرج ، المذيعه افتكرت ان حد من فريق العمل عمل حركة ضايقته ، وعلشان يحسموا الجدل ، جري المخرج ورا محمود حميدة وقاله " أستاذ محمود ، حضرتك احنا لسه ماخلصناش " ... الراجل رد بمنتهى الهدوء وبنفس الابتسامه وقاله .... " زهقت "
واحد اعرفه كان بيحكيلي ان أول بنت حبها في حياته لما سابته كان مستغرب قوي ، لأنهم كانوا بيحبوا بعض جداً وتقريبا ماكنوش بيتخانقوا ولا كان في اي سبب للفراق .. فجأه كلمته في التليفون وقالتله انها مش عايزه تكمل ، ولما سألها عن السبب ، قالتله ... " زهقت "
المحزن في كلامه انه ماكنش شايف ان " زهقت " مبرر مقنع انها تمشي ، كان بيقولي انه اهون عليه انها كانت تقوله انها قابلت حد احسن منه او انه مابقاش بيفهمها زي زمان او بطل يبقى حنين ، الحاجات اللي بنسمعها دايما في قصص الفراق دي ، لكن زهقت ؟! ايه زهقت دي
مش بالضرورة أمشي علشان روحي ماتت ، ولا علشان استنفذت طاقتي لدرجة اني مش طايقه ولا قادره أقاوم ، مش بالضرورة أفضل قاعده علشان عيب أمشي ، ولا علشان مش مضطره اراجع حساباتي واخد قرار صح ...
ممكن أمشي بمنتهى البساطه ومن غير ما أجمل الكلام
علشان ... " زهقت "